Nafile na ang dugang nga kaso sang Anti-Drunk Driving Act batok sa Indian National nga nag-arado sa mga nagaprusisyon sa Brgy Alangilan, Bacolod City sang Biyernes Santo.
Madumduman nga reckless imprudence resulting to multiple homicide, multiple physical injuries, kag damage to property lamang ang una nga nafile nga kaso batok sa Indian national nga si Jagpret Singh, 37 anyos.
Si Singh ang gilayon nga nakapyansa matapos gintanyag ang recommended bail nga P60,000.
May una na nga mga naggwa nga balita nga ginbasura ang ginfile nga reklamo sa Republic Act 10586 ukon Anti-Drunk Driving Act.
Apang sa press conference kaina, gin-athag ni City Prosecutor Atty Ma Theresa Ditching, nga wala nila ginbasura ang kaso, apang ini ang ginset aside bangod kulang pa sang ebidensya.
Suno diri, nafile gilayon ang nauna nga mga kaso bangod may nagkalamatay nga pamatuod sa krimen.
Sa baylo, sa RA 10586 kinahanglan pa nga maipadalom sa alcohol test.
Suno kay Ditching, kasunod nga adlaw pa napaidalom sa alcohol test si Singh kag nagpositiboapang ang result ang ginkinahanglan pa nila nga ipabasa sa experto antes magamit nga ebidensya.
Ang Anti-Drunk Driving Act ang may mas malawig nga jail time nga nagdangat sa 12 ka tuig.
Gani ang recommended bail sang kaso ang magadangat sa P120,000.
Sa pihak nga bahin, ginpahayag naman ni Bacolod City Police Office (BCPO) Director Police Col. Joeresty Coronica nga ang kapulisan ang dapat may-ara sang breath analyser ukon alcohol swab agud makadeterminar sang level sang alcohol sa lawas sang driver agud matumod kun ‘Driving Under the Influence of Alcohol’.
Apang antes makaangkon sang kaangay nga equipment, kinahanglan anay nga ideputize sang Land Transportation Office.
Apang ini ang ginrecall na sa ila, gani wala na sa karun sang kapasidad ang kapulisan sa paggamit sang equipment.
