3-3 na ang NBA Finals game sa tunga sang Indiana Pacers batok sa Oklahoma City Thunder matapos madaog sang Indiana ang Game 6 sa score nga 108-91.
Humalin sa 1st Quarter nagpangibabaw na ang Indiana tubtob nga nalab-ot ang peak lead sa 3rd Quarter kun sa diin nagdangat sa 30 puntos ang abanse.
Sa interview sang Bombo Radyo Bacolod kay Basketball Analyst Coach Leo Ceralbo, sa nangin dalagan sang hampang, temprano pa sini nakita nga ma-extend sa Game 7 ang NBA Finals.
Dako nga factoang mga bench players kun ngaa nagdangat sa 17 ang abanse sang Indiana, bangod sa nangin maayo nila nga kontribusyon kag kumbinasyon sa mga key players.
Dugang pa nga maninit man ang pagpamuntos nanday Shai Gilgeous-Alexander kag Chet Holmgren sang Oklahoma.
Madamo man ang turnover sang Oklahoma kag wala man natutukan ang pagbantay kay T.J. McConnell sang Indiana nga amo ang nagapadako sang gap.
Suno diri, maayo pa kuntani ang performance sang Oklahoma sa 1st Quarter, apang makita gid ang determinasyon sang Indiana nga makuha ang Game 6 agud mapadayun ang hampang sa Game 7.
Nagapati si Coach Leo nga may nakahanda na nga adjustment kag game plan ang Oklahoma para sa ulihi nga hampang nga magabalik na sa ila nga home court.
