Maga-conduct sang follow up operation ang kapulisan kaupod ang National Bureau of Investigation (NBI) sa pagtumod sa primary suspect nga nagsugo nga kawaton ang Fernando Amorsolo painting gikan sa Hofileña Museum sa Barangay 1, Silay City.
Madumduman nga sang Hulyo 3, ginkawat sang duha ka persona ang painting kag Hulyo 11 sang ini narekober paagi sa entrapment operation sang National Bureau of Investigation-Special Task Force (NBI-STF) sa Tomas Morato, Quezon City.
Nadakpan sa entrapment operation sanday Ritz Chona Ching kag Donecio Somaylo nga nagdeliver sang painting nga ibaligya sa balor nga P3.5 million.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, napasakaan na sang kaso nga violation sang Presidential Decree 1612 ukon Anti-Fencing Law ang duha.
Apang ang duha nga nadakpan sa Quezon City ang lain sa duha ka persona nga nagkawat sa museum sa ciudad sang Silay, santo sa CCTV footage.
Nahibaluan nga ang duha nga suspek nga nagkawat sa Silay City ang mga residente sang probinsya sang Iloilo.
Pahayag ni Darroca, may yara sang patigayunon nga follow up operation matapos nga mahibaluan nga ang utod sang nadakpan nga si Ritz Chona Ching ang nakakilala kun sin-o ang nagsugo nga kawaton ang painting nga amo makabig nga primary suspect.
Ginkumpirmar naman sang alkalde sang ciudad sang Silay, Negros Occidental nga nahatag na sa informant ang P25,000 nga padya nga ginpain sini bilang pagpasalamat nga nasolbar ang kaso.
Sa interview sang Bombo Radyo Bacolod kay Silay City Mayor Joedith Gallego, nahatag na ang P25,000 paagi kay Silay City Police Station Chief of Police, Police Lt. Col. Mark Anthony Darroca bangud nagpadulong man ini sa Manila.
Suno kay Gallego, indi pa mapat-od kun san-o dal-on balik sa ciudad sang Silay ang painting ni Fernando Amorsolo nga ginkawat sa Hofilenia Museum.
Padayon pa sa karun ang imbestigasyon sang mga kapulisan agud nga matumod ang babayi nga kaupod sang lalaki nga nagkawat sang painting.
Madumduman nga ang lalaki nga isa sa nagkawat sang painting ang natumod paagi sa rouges’ gallery sang Philippine National Police kag napasakaan na sang kaso.
