Palawigon pa sang Bacolod City government ang inoras sang truck ban nga ginapatuman sa karon sa circumferential road.
Suno kay BTAO head Police Major Junji Liba, sakop sang truck ban ang circumferential road halin sa CEGASCO padulong sa Bacolod Silay Airport Access Road sa Bangga Bata.
Sa idalom sang City Ordinance 542, ang truck ban ang ginapatuman alas-6:00 tubtub alas-8:00 sa aga kag nagaresume alas-4:00 sa hapon tubtub alas-7:00 sa gab-i.
Apang ginaplano ang experimental scheme kun sa diin dulaon na ang window sang truck ban kundi diretso na halin alas-6:00 sa aga tubtub alas-9:00 sa gab-i.
Suno kay Liba, sakop sini ang tanan nga trucks kaangay sang cargo kag delivery trucks nga sarang makalabay sa circumferential road halin alas-9:00 sa gab-i tubtub alas-6:00 sa aga.
Exempted naman sa truck ban ang emergency vehicles, nagadala sang materyales para sa proyekto sang gobyerno kag iban pa nga marked vehicles, samtang indi gid makalabay halin alas-6:00 sa aga tubtub alas-9:00 sa gab-i ang mga truck nga nagakarga sang tubo.
Ang violator ang magabayad sang multa nga P1,000 sa first offense; P3,000 para sa second offense; kag P5,000 para sa third offense.
