BACOLOD CITY — Nagnubo ang numero sang insidente sang sunog nga narekord sa bilog nga isla sang Negros sang tinalikdan nga bulan sang Marso kun ikumparar sa pareho nga bulan sang tuig 2016 kun sa diin gina-obserbar ang Fire Prevention Month.
Sa data nga ginpagwa ni Fire Senior Supt. Fred Trajeras, acting regional director sang Bureau of Fire Protection Negros Island Region, 62 ka insidente sang sunog ang narekord subong nga tuig.
Ini ang mas manubo sang 35 kun ikumparar sa 97 ka mga insidente sang sunog nga nagluntad sang tuig 2016.
Subong nga tuig, 3.4 million pesos ang balor sang halit nga natuga sang sunog kag ini ang mas manubo sa 7.1 million pesos nga narekord sang tinalikdan nga tuig.
Suno kay Trajeras, ang pagnubo sang insidente sang sunog ang bangud sa masangkad nga kampanya sang ahensya batok sa sunog amo gani nga nagtaas ang awareness sang publiko sa mga paagi agud nga malikawan ang pagtuhaw sang kalayo.
Kahapon, Marso 31, nagtakop na ang Fire Prevention Month apang nagapanawagan si Trajeras nga himuon nga fire prevention day ang tagsa ka adlaw.
Subong nga tuig, ang tema sang amo nga obserbasyon amo ang “Buhay at Ari-arian ay Pahalagahan, Ibayong Pag-iingat sa Sunog ay sa Sariling Pamamahay Simulan.”
