Irigasyon nga natapos sang 2020 sa banwa sang Murcia, ginreklamo bangod wala gihapon napatubdan sang tubig makaligad ang apat ka tuig

Nagpanawagan sa National Irrigation Administration (NIA) ang residente sa Barangay Sta. Rosa, Murcia, matapos nga wala gihapon ginpatubdan sang tubig ang gintukod nga irigasyon nga natapos apat ka tuig na ang nakaligad.

Sa audio clip nga ginpadala sang tagreklamo nga ginkilala nga si Fidel Arnold, nagabagtik ang duta sa ila mga talamnan kag sila ang madugay na nga wala nakatanom bangod wala gihapon mapatupdan ang irrigation system nga gintukod sang NIA.

Panawagan sini nga ma-imbestigahan sang NIA ang contractor sa proyekto agud matumod kun natapos na sini kag mahimo na nga mag-operate ang irigasyon.

Suno sa mangunguma, luyag gid nila mahibaluan ang rasun kun ngaa gintukod ang irigasyon apang wala man gingamit.