May mga bagay nga kun madula indi na ini makita pa apang may iban man nga nagakakit-an kaangay lamang sang natukiban sang mga otoridad sa Madrid, Spain ang isa ka 1919 painting ni Pablo Picasso nga nadula pila ka semana antes ini ipakita sa isa ka exhibit sa nasambit nga pungsod.
Ang magamay nga framed artwork nga may title nga “Still Life with Guitar” ang kabahin sang mas dako nga shipment sang mga artworks nga gindala halin sa Madrid padulong sa Granada.
Nakabaton sang report ang mga otoridad sang Oct. 10 matapos manotisyaran sang mga organizer sang exhibit nga nadula ang isa sa mga artwork matapos buksan ang mga crate.
Suno sa mga otoridad, posible nga wala malakip sa truck ang painting antes magbyahe ang kargamento. Indi pa maathag kon may krimen nga natabo sa insidente samtang padayon ang imbestigasyon sang historical heritage brigade.
