Ginapahanumdom sang parish priest sang St. Joseph the Worker Parish sa banwa sang EB Magalona nga pamalandungan ang waay tupong nga gugma ni Hesu Kristo subong nga Semana Santa.
Sa interview sang Bombo Radyo Bacolod kay Fr. Ernie Larida, ginapasalamatan sini ang paghatag sang gobyerno sang tion para sa balaan nga mga inadlaw, kun sa diin wala sang klase kag opisina humalin Miyerkules Santo tubtob Domingo sang Pagkabanhaw.
Pahanumdom sini nga sa Semana Santa, dapat pamalandungan ang dako nga paghigugma kag wala sang tupong nga pagsakripisyo ni Kristo.
Ginbatas sini ang kasakit, gin-atubang ang kamatayon kag ginpakita ang matuod nga kabuhi sa iya nga pagkabanhaw.
Suno kay Fr. Larida, apisar nga indi takos ang tawo, padayun gihapon ang paghigugma sang Diyos.
Sa pihak sang pagtraidor kag pagbaligya sang iya apostoles, padayun ang pahanumdom ni Hesus nga ipadayun ang misyon nga iya ginsuguran, ang misyon a paghigugma sa tanan, misyon sa pagpatuman sang hustisya kag misyon sa pagdala sang paghidaet.
Gani sa Semana Santa, dapat nga ang tanan ang makigbahin sa pagpamalandong sa wala tupong nga paghigugma sang Ginoo.
Pahanumdom sini nga sini nga tion sang Semana Santa, ang tiyempo nga ginhalad sang Ginoo ang iya kabuhi para sa tanan nga tawo.
Pahayag ni Fr. Larida, nga madamo sang kaangay nga nagakalipat na, kun sa diin imbes nga magpamalandong, madamo ang nagabakasyon.
Gani apisar nga magabakasyon, panugyan na laman sini nga sa pagtipon sang pamilya, dumdumon nga si Hesus ang una nga naghatag sang kabuhi para sa tanan nga tawo.
