Isa ang narecord nga napatay kag padayon pa nga ginapangita ang 30 ka iban pa matapos ang nagluntad nga landslide sa isa ka landfill sa Cebu City.
Kadam-an sa mga biktima ang mga nagatrabaho sa materials recovery facility sa Barangay Binaliw.
Na-rescue sang mga otoridad ang siyam ka mga tawo kag gindala na ang mga ini sa ospital.
Naakig naman ang mga himata sang mga biktima matapos nga wala ang mga indi ginpasulod sang mga gwardiya sa lugar bangud ang mga rescuers lamang ang ginpahanugutan nga makasulod.
Samtang, nagpadala sang emergency teams ang Philippine Red Cross matapos narumpag ang landfill sa Barangay Binaliw, Cebu City mga alas 5:00 sang hapon.
Suno sa report sang RC143 volunteer nga si Mayline Alolor, may mga indibidwal nga posible na-trap sa insidente.
Gilayon nga nagpadala sang ambulansya ang Philippine Red Cross Cebu Chapter kag naga-coordinate sa lokal nga otoridad para sa rescue operations.
Ang Binaliw landfill amo ang mayor nga dumpsite sang Cebu City nga madugay na nga ginasaway bangud sa safety kag pollution issues.
Sang mga nagliligad nga tinuig, may ginreport man nga soil erosion kag pagkaguba sang bahin sang landfill nga nagatuga sang kahadlok sa mga pumuluyo.
Ginapanugyanan ang mga tawo sa palibot sang lugar nga magpalayo samtang nagapadayon ang clearing and rescue.
Ginalauman nga maga-issue sang dugang nga updates ang mga otoridad angut sa kadamuon sang mga apektado kag ang status sang operasyon.
Sa karun isa na ang kumpirmado nga patay bangud sa insidente.
