Isa ang patay samtang duha naman ang pilason nga lunsay mga menor de edad matapos makabunggo ang ginasakyan nila nga pick-up sacenter island traffic sa atubang sang isa ka BPO company sa Araneta St., Barangay Tangub, Bacolod City kaina sang kaagahon.
Ginkilala ang napatay kay Francis Batac, 14-anyos samtang pilason naman sanday Guillermo Jocson, 17-anyos kag Steve Carl Yap, 13-anyos kag lunsay residente sang Green Plains Subdivision, Barangay Singcang Airport.
Sa interview sang Bombo Radyo Bacolod kay P/Capt. Junray Batadlan, hepe sang Bacolod Police Station 8, ginpahayag sini nga nakainom ang mga biktima nagikan sa Green Plains kag naghagaray nga maglagaw.
Suno kay Batadlan, ginmaneho ni Jocson nga isa ka helper sa isa ka residente sang Green Plains ang pick-up apisar nga wala ini nakalisensya sa tag-iya.
Naga-usoy padulong sa norte nga direksyon ang salakyan sang aksidente lang sini nga nabungguan ang center island traffic nga nagresulta sa pagbaliskad sang pick-up.
Bangud sa mabaskog nga impact, gilayon nga ginbawian sang kabuhu si Batac samtang nakaangkon naman sang mga pilas sanday Jocson kag Yap kag padayon karon nga ginabulong sa ospital.
