Patay ang 24-anyos nga driver sang motorsiklo samtang pilason naman ang duha matapos makabunggo sa isa pa ka motorsiklo sa Purok Orchids, Barangay Haba, banwa sang Candoni, Negros Occidental alas-5:50 kahapon sang hapon.
Ginkilala ang napatay nga si alyas “Ariel”, 24-anyos, lalaki, single,kag resident sang nasambit nga lugar nga nagamaneho sang Honda XRM 125 nga motorsiklo.
Samtang ang pilason naman amo si alyas “Richmar”, 21-anyos, lalaki, single, nga nagamaneho sang black Rusi Surf 125 nga motosiklo angkas ang isa ka menor de adad nga lunsay mga residente sang Purok Lubi sa nasambit nga banwa.
Sa inisyal nga impormasyon, ang duha ka motosiklo ang nagabiyahe sa magkatuhay nga direksyon.
Tuyo kuntani magliko ni Ariel apang sang nakita sini nga padulong na ang motorsiklo nga ginamaneho ni Richmar, gilayon siya nga nagbalik sa natuo nga linya.
Samtang, ang Rusi nga motorsiklo nga ginapahayag makusog ang pagpadalagan ang nadulaan sang direksyon kag nagkadto sa linya ni Ariel nga nagresulta sang pagbunggo-anay sang duha ka motorsiklo.
Bangud sini, gilayon nga gindala ang mga biktima sa Candoni Rural Health Unit para sa nagakaigo nga pagbulong apang si Ariel ang gindeklarar nga dead on arrival.
