Ginpasakaan na sang kaso kahapon ang isa sa mga nagpangholdup sa tatlo ka solterito sa Prk Kapalaran, Jr Torres Subdivision, Brgy Singcang-Airport sang Lunes.
Sa interview sang Bombo Radyo Bacolod kay Police Captain Sherwin Galupar, station commander sang Bacolod Police Station 8, nagalakaton ang tatlo ka lalaki nga naga-edad sang 18, 15 kag 14 anyos sang sila ang hinali nga ginpalapitan sang duha ka lalaki nga nakamotorsiklo.
Ang mga biktima ang gintayaan sang armas sang mga holdupper kag gintaban ang ila nga mga cellphone, apang sang malagyo na ang mga suspect, ang 18 anyos ang nangisog kag naglagas.
Suno kay Galupar, mahimo nga nagsala na ang isa sa mga holdupper bangod sila ang ginalagas, gani ini ang natumba.
Ginbiyaan na lamang sini ang iya motorsiklo kag nagsakay sa kaupod.
Sa hot pursuit operation sang kapulisan, natigayon nga macorner ang isa sa mga holdupper nga naga-edad 25 anyos.
Ini ang napaidalom na sa inquest proceedings kahapon sa kaso nga robbery-holdup.
Yara man sa Bacolod Police Station 8 ang narecover nga motorsiklo, nga ginadudahan nga ginmotornap bangod kaangay nga ginpintahan lamang.
Sa karun, padayun pa nga ginapangita ang isa ka suspect.
