Isa ang kumpirmado nga napatay kasunod sa pagpang-atake sa Abu Dhabi sa nagapadayon nga giyera sa tunga sang US, Israel kag Iran.
Suno sa United Arab Emirates Ministry of Defense ang napatay nakilal-an nga isa ka Asian national samtang wala pa sang ginpagwa nga dugang nga detalye angot diri.
Ginpahayag sang mga otoridad sang Kuwait, Qatar, UAE kag Jordan nga may presensya sang militar sang U.S. nga ila na-intercept ang mga missile antes pa man ini magtuga sang dako nga halit.
Gin-ako naman sang Islamic Revolutionary Guard Corps (IRGC) ang pagpang-atake.
Suno diri, naigo ang mga “all occupied territories” nga base militar sang U.S. sa rehiyon.
Samtang, ginkumpirmar sang Bahrain nga ginbomba man sila sang amo nga grupo kag naigo ang isa ka service center sang U.S. Fifth Fleet amo nga sila ang nagbalos.
Nagpagwa man ang mga otoridad sang Abu Dhabi sang emergency alert sa mga pumuluyo nga magkadto sa pinakamalapit nga safety building.
May mga report man sang asud-asud nga pagpalupad sang mga fighter jet sa pila ka bahin sang ciudad.
Bangod sa nagapadayon nga tensyon, temporaryo nga ginkansela sang pila ka international airlines ang ila mga byahe sa pila ka bahin sang Middle East.
