Igakonsiderar ni US President Donald Trump nga pahanugutan si Israeli Prime Minister Benjamin Netanyahu nga padayunon ang military action sa Gaza in kaso nga indi pagtumanon sang Hamas ang promisa sini sa ceasefire agreement.
Suno sa US President, posible nga makabalik ang Israeli forces sa Gaza sa tion nga hambalon niya ini.
Ini ang ginpahayag sang US President matapos akusahan sang Israel ang Hamas nga wala nagsunod sa kasugtanan nga pagbalik sang mga hostages, buhi man ukon patay, bilang kabahin sang kasugtanan agud matapos na ang gyera.
Sa data sang Miyerkules sang aga, nabalik na sang Hamas ang 20 tanan ka mga buhi nga Israeli hostages apang siyam pa lamang nagikan sa 28 ka mga nagkalamatay nga hostages ang nabalik sang Hamas.
Ginpahayag naman sang militante nga grupo nga nabalik na nila ang tanan nga bangkay sang mga hostages nga sarang nila nga ma-access samtang ang iban nga mga bangkay ang nagakinahanglan sang specialist equipment agud mapangita kag marecover.
