BACOLOD CITY — Ginterminate ang tanan nga mga job order casuals sa munisipyo sang banwa sang Isabela nga gin-hire sa idalom sang administrasyon ni the late Mayor Enrique ‘Quito’ Montilla III.
Ini ang kasunod sang pagpungko ni Vice Mayor Joselito Malabor bilang alkalde pinaagi sa rule of succession.
Sa interview sang Bombo Radyo kay Mayor Malabor, ginpa-terminate niya ang 234 tanan ka mga JOs nga nagahatag sang serbisyo sa tanan nga opisina sa munisipyo sang banwa.
Ang order ang ginpapanog sang alkalde sa tanan nga department heads sang Abril 20.
Suno kay Malabor, kabahin ini sang transition period kun sa diin ginalantaw kun pila gid man ang kinahanglanon nga JOs matapos natalupangdan sang alkalde nga indi tanan nga casuals ang naga-duty apang padayon nga ginaswelduhan.
Sa pagbanta sini, magalapaw lamang sa isa ka gatos ang job order nga kinahanglan sang banwa.
Ang mga ginpang-terminate ang ipaidalom sa evaluation kag diri lantawon kun sila ang igabalik ukon kakason na gid.
Sa masunod nga semana, ginalauman nga matapos na ang performance evaluation kag diri mahibaluan kun pila ang mawad-an sang trabaho.
