Challenging para sa Negros Oriental Police Provincial Office (NORPPO) ang pagtumod sa mga persona nga nagpost sang pagpamahog sa duha ka eskwelahan sa Negros Oriental.
Madumduman nga ginsuspende ang klase sang Miyerkules sa Negros Oriental State University (NORSU)-Bais Campus kag Bais National High School matapos makabaton sang magkatuhay nga pagpamahog.
Sa interview sang Bombo Radyo kay NORPPO Spokesperson Police Captain Stephen Jaynard Polinar, ginpahayag sini nga kalabanan sang mga threat ang ginapost online kag apisar nga makuha nila ang mga pangalan sang mga ini, mabudlay sa gihapon suno sa iya ang pagtrack sa IP address bangud dummy accounts ang ginagamit sang mga persona nga nagapost sang threats kag ginadelete man dayon ang amo nga mga account.
Sa pihak sini, ginpasalig ni Polinar nga ginahimo sang kapulisan ang tanan agud masiguro nga ang tanan nga ginareport nga threats ang marespondehan gilayon.
Nagapanawagan man ini sa publiko nga likawan ang pagpalapta sang sala nga mahimo magtuga sang panic ukon kahadlok sa publiko.
