Nagpasalig man ang alkalde sang ciudad sang Kabankalan nga magahatag ini sang bulig sang pamilya ni Eumil Francisco nga nag-utas sang kaugalingon nga kabuhi matapos nga ginlabo ang asawa kag apat ka mga kabataan sa Purok Ibos, Barangay Tapi, Kabankalan City.
Sa interview sang Bombo Radyo Bacolod kay Mayor Benjie Miranda, ang ciudad ang magahatag sang burial assistance agud nga mahaya kag mapalubong si Francisco.
Suno Miranda, magahatag man siya sang personal nga bulig sa pamilya.
Ginpahayag man sini nga makig-angot man ini sa regional office sang Department of Social Welfare and Development para sa dugang nga bulig.
Madumduman nga samtang nagapreparar sang panyapon ang iloy kag mga kabataan, wala sang ka rasun-rasun nga ginlabo sang amay ang iya pamilya gamit ang binangon.
Ang anom kag siyam ka tuig nga bata sang mga ini ang gindala na sa Corazon Locsin Montelibano Memorial Regional Hospital matapos makaangkon sang samad sa likod kag ulo.
Ang iloy kag tatlo ka tuig nga bata ang yara naman sa Kabankalan District Hospital samtang nakagwa na sa ospital ang isa ka tuig nga baby.
Samtang wala naman nasamaran ang 13 anyos nga bata nga amo ang nakakita sa pag-utas sang amay sang iya kabuhi pinaagi sa pagbuno sang kaugalingon.
Sa imbestigasyon sang kapulisan, masobra duha ka tuig na nga nagasuprer sang nervous breakdown ang mangunguma nga amay.
