Magahimo na sang executive endorsement si Kabankalan City Mayor Benjie Miranda sa Sangguniang Panlungsod para sa pagdeklarar sang state of calamity bangod sa kahalitan sang El Niño.
Sa interview sang Bombo Radyo Bacolod kay Miranda, gin-athag sini nga nakaconvene na ang Disaster Risk Reduction and Management Council kag ila na nga gin-aprubahan ang pagdeklarar sang state of calamity.
Suno sa alkalde, sa tion nga maaprubahan sang Sangguniang Panlungsod, sarang na nga mahatagan sang bulig ang mga apektado nga sektor.
Suno kay Miranda, madamo sang mga katubuhan ang nagkalalaya na, kag ang mga tatlo tubtob apat ka bulan na nga tubo, ang indi nagid makasalbar.
Dugang pa sini nga gamay lamang nga kalayo, madasig na nga nagalapta gani madamo man sang mga katubuhan ang nasunog.
Nagalitik naman ang mga duta, gani dako man ang kahalitan sa humayan, magluwas lamang sa mga malapit sa suba nga may-ara pa sang makuhaan sang tubig.
Paathag sang alkalde nga indi lamang mga mangunguma kundi halos tanan ang apektado sang El Niño bangod madamo sang mga lugar nga wala naman sang supply sang tubig.
Suno kay Miranda, ang mga deepwell ang sa masami sa aga na lamang may tubig kag nagahubas na pagdangat sang udto.
Bangod sini sila ang nagapatigayon man sang water rationing pinaagi sa fire truck agud may magamit nga tubig sa sulod sang panimalay.
Aminado ang alkalde nga apisar sa effort, indi nila mahatagan ang tanan nga nagakinahanglan.
Ginakahangaw-an pa sini ang posibilidad nga wala sang magamit ang mga firetruck sa tion nga may sunog.
Nagapati ang alkalde nga indi na magapamatok ang mga konsehal sa ginsumiter sini nga resolusyon kag gilayon man nga aprubahan ang pagdeklarar sang State of Calamity.
Suno sa alkalde, sa karun mabatyagan nagid kun ano ka importante ang tubig, gani siya ang naghimo naman sang executive endorsement nga ang mga nagapanag-iya sang duta ang dapat magtanom sang mga native trees sa 10 porsyento sang ila propedad.
Sa pa diri, plano man sini nga magbakal sang mga water pump para sa irrigation nga makabulig sa mga mangunguma.
