BACOLOD CITY-Nagbiya na ang grupo nga KADAMAY sa housing unit para sa mga uniformed personnel sa Brgy. Felisa ciudad sang Bacolod sini gid lamang nga hapon.
Nahibaluan nga naghatag ang National Housing Authority (NHA) sang ultimatum nga magbiya ang nasambit nga grupo sa lugar las-3:00 sini nga hapon.
Nahisugtan sa negosasyon nga magasapol ang NHA, KADAMAY kag iban pa nga opisyal sang ahensiya kag city government sang Bacolod sa Setyembre 7 sini nga tuig.
Suno kay Diego Malacad, secretary general sang United Negros Drivers and Operators Center (UNDOC) nga isa man sa mga grupo nga nag-upod sa mga pumuluyo nga nagsulod sa lugar kahapon sang aga, nangin madinalag-on sila sa ila kawsa.
Gin-athag sini nga wala sila nagpadulong sa lugar agud mang-agaw sa mga housing units kundi mapakita lamang nga madamo sang mga pumuluyo sa ciudad ang wala sang kaugalingon nga mga puluy-an, kag ang mga uniformed personnel ang nagapabaya lamang sa proyekto sang gobyerno para sa ila.
Nahibaluan nga ang housing project nga ginatawag Ciudad Felisa ang ginabug-usan sang 1,498 units kag lunsay may tag-iya na ang mga ini suno sa NHA.
Kahapon sang aga, kapin sa 1,500 naman ka miembro sang KADAMAY ang nagsulod sa lugar.
