Nagdangat sa masobra P35.9 million ang balor sang kahalitan sa talamnan sang palay sa probinsya sang Negros Occidental tuga sang mainit nga panahon.
Sa interview Department of Risk Reduction and Management (DRRM) Department of Agriculture – Negros Island Region (DA-NIR), Engineer Marion Tagle, pila na ka hektarya sang talamnan ang nahalitan bangud sa padayon nga epekto sang El Niño sa probinsya, ilabi na ang mga talamnan nga wala sang irigasyon.
Suno kay Tagle, ang total sang talamnan sang palay nga nahalitan sa probinsya amo ang yara na sa 1,338 ka talamnan kag ginabanta nga ini ang may balor sang masobra P35.9 Million.
Suno diri, nagdangat sa 42 hectares ang totally damaged kag wala na sang tsansa nga marekober pa.
nagdanga4 naman sa 1,296 hectares ang mahimo marekober.
Sa talamnan naman sang mais sa Negros Occidental, nagdangat sa 110 hectares ang nahalitan nga nagabalor sang masobra P4.2 million.
Kapin 18 hectares ang totally damaged kag 91 hectares ang partially damaged.
Kalakip sa mga Local Government Unit ukon LGU nga may reported damage sa humay Cadiz, Escalante, Hinigaran, Ilog, Kabankalan City, La Castellana, Moises Padilla, Sagay City, San Carlos City, Toboso kag Don Salvador Benedicto.
