BACOLOD CITY — Gintawag sang bag-o nga hepe sang kapulisan sa banwa sang Hinigaran nga “separation anxiety” lamang ang ginbatyag sang ila mga tinawo sang ginkakas sa puwesto si Police Senior Insp. Lawrence Gerald Bathan.
Ini matapos nga kalabanan sang mga pulis sa Hinigaran Municipal Police Station ang wala nagreport sa duty matapos gin-relieve si Bathan.
Nahibaluan nga si Police Chief Insp. Jake Barila ang ginbulos kay Bathan matapos ini ginmandu mismo ni PNP Chief Director General Ronald “Bato” dela Rosa bangud sa indi paghangpanay sa tunga sang anay hepe kag ni Hinigaran Mayor Jose Nddie Arceo.
Sa interview sang Bombo Radyo, ginpahayag sang bag-o nga hepe nga sadtong una, indi malipod nga may paglain sang buot ang mga katapo sang Hinigaran Police Station sa pagkakas kay Bathan apang sang ulihi, amat-amat nga nabaton sang mga ini ang pagpungko ni Barila, nga personal ginpili ni Mayor Arceo.
Ginpabutyag ni Barila nga maayo na ang kooperasyon sang iya mga tinawo, ilabi na sa kampanya kontra ilegal nga druga.
Nahibaluan nga kahapon, personal nga nagbisita si Negros Occidental Police Provincial Office (NOCPPO) Director Police Senior Supt. Rodolfo Castil sa Hinigaran Police Station agud makigsapol sa kapulisan kag ginapasumiter sang paathag ang indi man gihapon magreport sa duty.
