BACOLOD CITY – Indi upang ang kakulang sa kwarta agud makatapos nga may latin honors sa kolehiyo.
Ini ang ginpamatud-an sang kapid nga Jean (magna cum laude) kag Joy (cum laude) Redondo, tumandok sang banwa sang Murcia, matapos nag-graduate bilang magna cum laude kag cum laude sa kurso nga Bachelor of Science in Office Administration sa Bacolod City College (BCC).
Suno sa kapid, ginahatagan lamang sila sang 50 pesos nga balon tagsa ka adlaw kag ini ang ila ginapaigo para sa pamelete, pagkaon kag kun kaisa, para sa photocopies sang tulun-an.
Katunga sang ila balon ang nagakadto sa plete kag ang nabilin amo ang igabakal sang sud-an sa ginbalon nila nga kan-on.
Swerte na, suno sa ila, kun may mabilin pa nga kwarta agud may idugang sila sa balon sa madason nga adlaw.
Apang sa pihak sini, nagpaninguha ang kapid agud makapadayon tubtob nga makatapos sa pag-eskwela.
Sandy Joy kag Jean ang nagtrabaho sa eskwelahan kag subong man sa fastfood restaurant agud mabuligan ang ila iloy nga nagatrabaho bilang kabulig sa kalan-an.
Nahibaluan nga ang kapid nga Redondo ang ginpadaku sang isa ka single mother kag daku ang ila pasalamat diri.
Suno kanday Joy kag Jean, magluwas sa pagtrabaho bilang kabulig sa kalan-an, naga-sideline pa gid ang ila iloy nga si Gemma Redondo agud madugangan ang income sang ila pamilya kag agud sila ang mapa-eskwela.
Suno sa kapid nga Redondo, sa pihak sang kapiot sang ila pagpangabuhi, wala sila nakabati gikan sa ila iloy nga mag-untat ang mga ini.
Sa baylo, padayon ini nga nagakayod agud sila matapos ang ginkuha nga kurso.
Karon nga nagbunga na ang ila pagpangabudlay, bugalon kag malipayon ang kapid bangud ila nahatagan sang kalipay kag dungog ang ila iloy.
