Sa pihak sang doble nga kabudlayan bangud dungan sila nga nag-eskwela sa kolehiyo, wala nagpalingkang ang kapid nga sanday Angelyn kag Angelou Belocura, tumandok sang ciudad sang Sipalay, sa mga kabudlayan kag sa baylo, magkaupod sila nga nagpanikasog agud makatapos sa ila nga kurso.
Sa live studio interview sa Bombohanay Bigtime Program sang Bombo Radyo sa kapid nga Belocura nga sang damlag lang nag-graduate sa kurso nga Bachelor of Science in Office Administration sa Bacolod City College (BCC), aminado ang mga ini nga nag-abot sila sa punto sang ila kabuhi nga nawad-an na sila sang inspirasyon bangud sang kabudlayan sa aspeto sang pinansiyal ilabi na nga nagaisahanon lamang ang ila magulang nga babayi nga nagatrabaho agud mahatag ang ila mga kinahanglanon.
Magluwas sa kapid, ang ila man magulang nga isa ka callcenter agent ang nagabakal sang maintenance nga bulong sang ila isa pa ka utod nga nagapamalatian kag subong man, ini ang nagapadala sang kwarta para sa galastuhon sang ila mga ginikanan sa Sipalay.
Suno kay Angelyn, may mga tinion nga wala sila sang balalunon kag wala man sila sang makaon ugani mapilitan sila nga maglakat lang pakadto sa eskwelahan kag ginaagwanta ang gutom bangud ila ginapainan sang kwarta ang pagpa-photocopy sang ila mga tulun-an.
Dugang pa ni Angelou, tuman nila nga ginahatagan sang importansiya ang ila pamilya kag wala sila sang iban nga handum kundi ang mahatagan sang maayo nga palaabuton ang mga ini rason nga amo na lamang ang ila pagtinguha nga makatapos kag wala ginausikan sang tiyempo ang pag-kamarada ukon paglagaw.
Karon nga nagbunga na ang ila pagpangabudlay, daku ang pasalamat sang kapid nga Belocura sa ila nga utod nga nagpanikasog agud sila makatapos kag subong man sa ila eskwelahan nga nagsuporta kag naghatag sang paghangop sa mga tinion nga yara sila sa kabudlayan.
Kaupod nanday Angelyn kag Angelou ang college administrator sang BCC nga si Dr. Johanna Bayoneta sa ila pagpadulong sa Bombo Radyo.
