BACOLOD CITY – Sa pihak nga sila ang ginbayaan antes pa man sila nabun-ag sa kalibutan, wala nagtanom sang kalain sang buot ang kapid nga nag-magna cum laude kag cum laude sa Bacolod City College (BCC) sa ila nga amay.
Sa interview sang Bombo Radyo, ginpahayag sang kapid nga Joy (cum laude) kag Jean (magna cum laude) Redondo, nag-graduate nga may latin honors sa kurso nga Bachelor of Science in Office Administration, sa baylo nga magdumot, ila pa ginapasalamatan ang ila amay nga nagahingalan kay Juanito Aleman sa pagdala sa ila diri sa kalibutan.
Suno sa mga ini, kun wala ang ila nga amay, wala man nila naeksperyensyahan ang kabuhi kag wala man nila malab-ot ang kun anuman ang may yara sila sa karon.
May mensahe man ang mga ini sa ila amay kag ini amo nga wala sila nagakadulaan sang paglaum nga isa ka adlaw, sila ang magakitaay.
Nahibaluan nga gintilawan na nanday Joy kag Jean nga pangitaon ang ila amay sa social media apang tubtob karon, wala pa nila ini makita.
May yara naman sila sang nauyatan nga ID nga may yara sang picture sang ila amay.
