Kapin 20 ka katapo sang police personnel ang magaupod kag magahatag segurigad sa pagdul-ong kay Nicus Balagusa sa ulihi nga palahuwayan subong nga adlaw, sa Greenhills Memorial Park sa ciudad sang Bacolod.
Nahibaluan nga si Nicus Balagusa ang 20 anyos nga senior high school student nga ginluthang patay sa Granada Heights, Barangay Granada, Bacolod City sang Hunyo 2.
Sa interview sang Bombo Radyo Bacolod kay Police Major Ramil Sarona, pinuno sang Bacolod Traffic Management Unit, naplastar na nila ang ila nga deployment plan para sa pag-upod sa paglubong kay Nicus.
Suno kay Sarona, may yara sang kapin 20 ka mga kapulisan nagikan sa Bacolod Police Station 4 ; Bacolod Police Station 5; Bacolod City Mobile Company kag Bacolod Traffic Management Unit ang magaupod sa lubong halin sa Acropolis Garden kun sa diin ginhaya si Nicus padulong sa Greenhills Memorial Park sa Barangay Bata, Bacolod City.
Suno diri, magadeploy sila sang mga kapulisan para sa lead marshalls kag magasiguro sang safety sang pamilya kasubong man sa mga magatambong sa paglubong sa biktima.
Nagpasiguro man ini nga nakahanda ang mga kapulisan sa ciudad sang Bacolod sa paghatag sang seguridad sa lubong ni Baligusa samtang wala man sang nabaton nga report ang BCPO angot sa mga pagpamahog sa pamilya.
