Yara sa 40 ang mga nastranded nga indibidwal matapos makanselar ang byahe sang barko sa Escalante City kag ang byahe padulong sa Lakawon Island sa Cadiz City.
Ini matapos ginpanaog ang Tropical Cyclone Wind Signal No 1 sa pila ka mga local government units sa Northern Negros Occidental bangod sa Severe Tropical Storm OPONG.
Ini ginalakipan sang Escalante City, Toboso, Calatrava, Sagay City, Cadiz City, Manapla, Victorias City, EB Magalona, Silay City kag Talisay City.
Sa interview sang Bombo Radyo Bacolod kay Philippine Coast Guard Station Northern Negros Occidental Spokesperson Lieutenant Junior Grade John Hoffer Olis, magapadayun ang sea trips sa iban nga pantalan kaangay sang BREDCO Port sa Bacolod City, Banago Port, Pulupandan Port, San Carlos Port kag bisan sa seaport sa EB Magalona apisar nga ini ang nalakip sa napaidalom sa Wind Signal No. 1.
Paathag ni Olis nga may byahe sa EB Magalona port bangod ang destinasyon ang padulong sa Iloilo nga wala sang Storm Signal.
