BACOLOD CITY-Kapin sa 15 milyones pesos nga balor sang ginasuspetsuhan illegal nga droga ang nakuha sa isa gina-alegar 17 anyos nga lalaki sa buybust operation sang City Drug Enforcement Unit (CDEU) sa Brgy. 31, Bacolod City kagab-i.
Sa interview sang Bombo Radyo kay Police Lt. Col. Leonardo Borromeo, team leader sang CDEU, target gid kuntani nila amo ang amay sang menor de edad apang madanlog gid ini.
Nahibaluan nga ang amay sang menor ang madugay na nga ginatarget sang kapulisan.
Ginpahayag ni Borromeo nga maabot gid ang tyempo nga ila madakpan ang matuod nga suspetsado.
Base naman sa panayasayon sang bata, ginbilin lang sa iya sang iya amay ang mga illegal nga droga.
Ini na ang ikatatlo ka beses nga ginbilinan siya sang iya amay kun sa diin ihatag ini sa isa ka babayi.
Ginabanta nga ang illegal nga droga nga nakuha sa suspetsado ang nagabug-at sang 500 grams kag nagabalor sang P15 million.
Gindala naman sa custodial facility sang Police Station 6 ang suspetsado kag ginapreprar na ang kaso batok sa iya.
Ginpahayag pa dugang ni Borromeo nga ila pa kumpirmahon kun matuod nga menor de edad palang ang nadakpan bangod base sa ila nga paglantaw, legal na ang pang edaron sini.
Nagbilin naman sang mensahe si Borromeo sa mga nagatulod sang illegal nga droga, nga untatan na nila ini bangod, ang mga otoridad ang indi maga-untat sa pagtapna sini agud mangin hilway ang syudad sang Bacolod.
