Ginaimbestigaran pa sang Talisay City Police Station ang ginaalegar suicide sa Hacienda Gusa, Barangay Matab-ang kahapon sang hapon kun sa diin nasapwan na lamang ang biktima nga wala na sang kabuhi sa comfort room sang ila balay.
Sa interview sang Bombo Radyo kay Police Major Jigger Gimeno, hepe sang Talisay City Police Station, ang biktima ang ginkilala kay Nerry Dairo, 61-anyos, single kag residente sang amo man nga lugar.
Suno sa hinablos sang biktima nga si Rhoderick Diaz, nakabugtaw ini sang iya nabatian ang duha ka sunod-sunod nga lupok kag iya nakit-an ang tiyo nga wala na sang kabuhi sa sulod sang banyo.
Sa inisyal nga pag-usisa, may igo sang pagkaluthang sa natuo nga bahin sang ulo ang biktima.
Suno kay Gimeno, nag-execute sang affidavit ang pamilya sang biktima nga indi naman sila magpasaka sang kaso bangud ginalantaw nga suicide ang natabo.
Sa pihak sini, lantawon pa sang imbestigador suno sa hepe kun gintiro gid man sang biktima ang iya kaugalingon gamit ang narekober nga .38 caliber revolver.
Suno sa iya pamilya, nakapabutyag na gid man ang biktima nga nagaplano ini nga utason ang iya kabuhi bangud nagasufrer ini sang depression.
