May duha na ka person of intetrest ang Bacolod Police Station 3 sa nagpatay sa 39 anyos nga lalaki sa Purok Puno, Barangay Banago, Bacolod City, sang Miyerkules, alas- 5:53 sang hapon.
Ang biktima ginkilala nga si Victor Hermano, 39 anyos, single kag residente sang Tinagong Paraiso, Barangay Banago.
Sa interview kay Police Captain Rosalino Pugoy Jr, station commander sang Bacolod Police Station 3, ginsundan sang motor riding suspects si Hermano samtang nagalakat-lakat ini kag hinali nga ginluthang sang duha ka beses nga gintunaan sang iya kamatayon.
Suno kay Pugoy, gina-imbestigaran pa kun ano ang motibo sa pagpatay kay Hermano kag ginaverify pa kun ano nga klase sang armas-luthang ang gingamit kag kun diin ang igo sang biktima.
Pahayag sini, may mga rekord nga involved sa pila ka insidente sang pagpangawat si Hermano apang wala sang may nagpasaka sang kaso batok sa iya.
Dugang pa sini, may yara sila sang ginpaggwa nga picture gikan sa CCTV footage kun sa diin nakit-an ang duha ka suspek amo nga nagahingyo ini sa mahimo makakilala sa mga suspek nga magkoordinar lamang sa kapulisan.
