May identity na ang kapulisan sa duha ka holdupper nga nagbiktima sang doktora sa GV Street, Brgy 19, Bacolod City sang Mayo 28 kapin alas-9:00 sang gab-i.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 1, una nga ginblotter sang doktora ang holdup robbery incident sa Bacolod Police Station 4, apang ini ang ginrefer sa ila bangod sa ila nga area of responsibility ang apartment building sang doktora.
Makita sa CCTV footage nga may tatlo na nga boarders nga una nga nakasulod sa pasilida.
Nagasunod sa mga ini ang doktora, apang pag-abot sa gate, didto naman hinali nagdulog ang riding in tandem suspects kag gintuyo nga holduppon ang doktora.
Ini ang nagbato kag nagtinguha pa nga makasulod sa apartment, apang naagaw gid sang duha ka suspect ang iya duha ka cellphone kag air pods.
Nagbato pa ang doktora apisar nga ginatutukan sang armas, kag nagtuyo pa nga lagson ang mga holdupper.
Suno kay Tapang, antes paman naglapta sa social media ang video, natumod na nila ang identity sang mga suspect, kag dako nga bulig ang nagkalainlain nga anggulo sang CCTV footage.
Apang tubtob sa karun, padayun pa ang ila hot pursuit operation agud madakpan ang duha.
Suno kay Tapang, gintuyo sang suspect nga ibaligya sa centroplex ang ginkawat nga cellphone, kag ini ang ila nga ginasundan.
