May yara na sang person of interest ang San Carlos City Police Station sa insidente sang pagpanghimulos kag pagpangawat nga nagluntad sa isa ka kampo sa Barangay Palampas, ciudad sang San Carlos sang Marso 30, Sabado de Gloria.
Suno kay Police Lt. Col. Nazer Canja, hepe sang San Carlos City Police Station, naga-inom-inom ang magnobyohanay nga wala lamang ginhingadlan kaupod ang isa nila ka abyan sang ginhagad sang 17-anyos nga nobyo ang nobya sini nga 28-anyos nga magpadulong sa kampo agud magpangihi, pasado alas 8:00 sang gab-i.
Sang yara na ang mga ini sa kampo, wala pa nakabatak sang iya panapton pang-idalum ang babaye ang hinali lamang ini nga ginlumpatan sang wala pa makilal-an nga suspetsado kag ginhambalan nga maghapa kag ginhimuslan.
Nagataya naman ang armas luthang sa nobyo sini nga menor-de-edad samtang nagakatabo ang pagpanghimulos.
Suno diri, kapin isa ka oras nagdugay ang pagpanghimulos apang wala sang may nahimo ang nobyo bangud posible nga natrauma ini.
Pagkatapos sang pagpanghimulos, ginkuha pa sang suspetsado ang kagamitan sang mga biktima.
Gilayon ang mga ini nga nagreport sa mga kapulisan kun sa diin ila ginlaragway ang description sang suspetsado nga ginabanta naga-edad sang 40 ka tuig kag madako ang panglawason.
Nagsanto naman sa litrato nga ginpakita sang mga otoridad ang paglaragway sang mga biktima kag nahibaluan nga isa ini ka notorous nga kawatan sa ciudad.
Sa karun nagapadayon pa ang operasyon sang mga kapulisan agud madakpan ang suspetsado.
