Preparado na ang kapulisan sa probinsya sang Negros Occidental sa pagbantay sa launching sang Panaad sa Negros Festival 2024 nga patigayunon sa Lunes, Marso 18.
Nahibaluan nga apisar Abril pa ang opisyal nga pag-umpisa sang kapiestahan, ginpatemprano ang launching ceremony nga paga-updan sang Lin-Ay sa Negros slashing ceremony.
Sa interview sang Bombo Radyo Bacolod kay Negros Occidental Police Provincial Office (NOCPPO) Spokesperson Police Lt. Abegael Donasco, nagpatigayon na sang Security Coordination Meeting ang NOCPPO upod sa Bacolod City Police Office kag iban pa nga law enforcement agencies nga magabantay sa mga aktibidad sa pagpatigayon sang Panaad sa Negros Festival 2024.
Sa inisyal, may mga ginplastar na nga magaserbe nga security officer sa isa ka area, kag sila ang may-ara man sang mga tawo nga pamunuan.
Aminado naman si Donasco nga bangod ini ang aktibidad sang probinsya, indi gid man kinahanglan ang augmentation gikan sa BCPO apang nagapasalamat ini nga ang kapulisan sa Bacolod City ang willing gid nga magpadala sang personnel agud magbulig sa seguridad.
Nagalaom naman ini sa kooperasyon sang mga Negrense kag bisita para sa matawhay kag malinong nga selebrasyon.
Pinaagi sini, mapabilin nga generally peaceful ang Panaad sa Negros Festival 2024.
