Nagpanugyan ang Bacolod City Police Office (BCPO) sa mga pumuluyo nga mag-report gilayon sa kapulisan kun sila ang nangin biktima sang hold-up ukon robbery agud masolusyunan gilayon ang krimen.
Sa interview sang Bombo Radyo Bacolod kay Police Colonel Eugene Rebadomia, City Director sang BCPO, sa nakaligad nga semana, may mga insidente sang robbery kag kinawatay ang naresolbar gilayon bangod sa madasig nga pag-report sang mga biktima sa kapulisan.
Suno sa iya, nadakpan gilayon ang mga suspetsado.
Suno diri, sang nakaligad nga semana, sa tatlo ka insidente nga na-record, nagresulta ini sa madinalag-on nga pagdakop sang mga suspetsado.
Samtang sa pihak nga bahin, pahanumdom ni Rebadomia nga ang pag-post sa Facebook ang indi makabulig sa pagresolbar sang kaso bangod mahimo ini magatuga sang kalibog kag indi klaro nga impormasyon sa publiko.
Hugot nga ginapahanumdom sang BCPO nga gilayon magtawag sa 911 bangud madasig ang pagresponde sang kapulisan.
Ginpasiguro man ni Rebadomia nga ang kapulisan ang handa gid kag may kabubut-on nga magbulig sa tagsa ka pumuluyo nga nagakinahanglan sang bulig.
Pahayag niya, kun indi pag i-report ang mga insidente, mabudlayan ang otoridad nga masolusyunan ang ugat sang problema.
Bangod sini, ginapasalamatan sang kapulisan ang publiko sa ila padayon nga kooperasyon agud ma-mentinar ang katawhayan kag seguridad sa komunidad.
