Nakahanda na ang Cadiz City Police Station sa paghatag sang seguridad sa mga pumuluyo kadungan sang pagpatigayon sang mga aktibidad para sa pag-obserbar sang Semana Santa sa ciudad sang Cadiz, Negros Occidental.
Sa interview sang Bombo Radyo Bacolod kay Police Lt. Lovella Cordova, Deputy Chief of Police sang Cadiz City Police Station, ang Cadiz City Police Station ang magadeploy sang police personnel agud nga magsiguro sang seguridad sang mga pumuluyo nga magaupod sa aktibidad sang Santo Niño Parish.
Suno kay Cordova may mga police personnel nga magabantay sa palibot sang simbahan ilabi na nga may patigayunon man nga vigil ang simbahan.
Nagpahanumdom man ang mga kapulisan sang Cadiz City sa pagpamuno ni Police Lt Col. John Joel Batusbatusan nga yara ang mga police personnel agud nga magsiguro sang seguridad sang mga deboto.
Nagpanugyan man si Cordova sa tanan nga mag-inum sang madamo nga tubig agud malikawan ang heat stroke kag ibilin ang balay sa kasilingan kun ang tanan nga mga tawo sa balay ang magalakat kag likawan ang pagpost sa social media nga sila ang naglakat agud nga malikawan ang insidente sang pagpangawat.
Dugang pa sini nga ang tanan nga mga motorista ang dapat nga tsekyaron ang salakyan ukon ang BLOWBAGETS (battery, lights, oil, water, brake, air, gas, engine, tire, kag self) agud nga masiguro nga safe kag makalikaw sa mga insidente sa dalanon.
