BACOLOD CITY – Matul-id ang ginapatigayon nga imbestigasyon sang Women and Children’s Protection Desk (WCPD) sang Bacolod City Police Office (BCPO) sa reklamo tuhoy sa gin-alegar pagsugo sang isa ka manunudlo sa Rizal Elementary School sa bilog sini nga klase nga bakulon ang apat nila ka mga classmate.
Suno kay BCPO WCPD Head Senior Police Officer 4 Arlene Torrendon, ila na nakuhaan sang pahayag ang tatlo sa 43 ka mga classmates ni a certain Anggi sa grade three section eight sa nasambit nga eskwelahan kun sa diin nag-aku ang isa sa mga ini nga nagbulig sa pagbalbal kay Anggi gamit ang glue stick.
Sa inisyal nga imbestigasyon, sa mandu sang maestra nga si Rowelyn Bolinas, ginpahapa si Anggi kag tatlo sini ka mga classmate sa lamesa sang desk kag ginbulos-bulusan sa paghampak sang ila mga classmate bangud sa ila pag-absent sang tinalikdan nga semana.
Ini ang nagresulta sa pag-angkon sang mga labhag sa buli sang mga biktima kun sa diin natam-an si Anggi bangud indi na ini makapungko kag magahigda.
Suno kay SPO4 Torrendon, uyat na nila ang mga ebidensiya kag natalana naman nila nga kuhaan sang affidavit ang biktima kag pamilya sini.
Ginalauman nga mapasaka na ang kaso nga paglapas sa Republic Act 7610 ukon Anti-Child Abuse Law batok kay Bolinas sa labing madali nga panahon.
