Ginapreparar na ang dokumento sa pagpasaka sang kaso batok sa duha ka lalaki nga nakuhaan sang kapin P14.2 million nga balor sang suspected shabu sa ginpatigayon nga buy-bust operation sang Police Station 2 sa Purok Camonsil, Barangay 3, Bacolod City, kahapon, alas- 2:59 sang kaagahon.
Ang mga naaresto amo sanday alyas “John”, ginakabig nga High Value Individual (HVI), 29- anyos, pintor, residente sang nasambit nga lugar; kag alyas “Mark”, SLI, 34- anyos, construction worker kag residente sang Purok GK, Barangay Cabug, Bacolod City.
Sa interview sang Bombo Radyo Bacolod kay Police Major Eugene Tolentino, station commander sang Bacolod City Police Station 2, sa Lunes sang aga igafile ang kaso nga paglapas sa Section 21 sang Republic Act No. 9165 ukon Comprehensive Dangerous Drugs Act of 2002 batok sa duha.
Suno diri, si John ang nakaagi na dakop sadto sa kaso nga homicide apang sa karun siya ang nadakop naman may kaangtanan sa illegal nga droga.
Ang nakumpiskar nga ilegal nga druga ang ginbanta nagabug-at sa 2,100 grams nga may standard drug price nga P14,280,000.
