Nadugangan sang isa ang kumpirmado nga kaso sang coronavirus disease 2019 (COVID-19) sa Western Visayas.
Sa interview sang Bombo Radyo Bacolod kay Dr. Mae Ann Sta. Lucia, spokesperson sang Deparment of Health Region 6, ginpahayag sini nga sa pinakaulihi nga data nga naggwa, isa ang nagpositibo sa 52 ka total lab results nga ginpagwa sang Abril 11 lamang.
Nagadangat na karon sa kabug-usan nga 40 ang confirmed cases sa Region 6 kun sa diin anom ang nag-ayo; pito naman ang nagkalamatay; 13 ang padayon nga admitted kag 14 ang naka-hime quarantine.
Ang nagdugang nga COVID positive patient sa Western Visayas suno kay Sta. Lucia amo si WV 40 nga isa ka 44-anyos nga lalaki nagikan sa LaPaz, Iloilo kag naka-facility quarantine sa karon.
Samtang, nagapabilin karon nga isahanon ang Guimaras nga wala sang kaso sang COVID-19 sa Western Visayas.
Nagapanguna diri ang Iloilo Province nga may 15.
Ginasundan ini sang Bacolod City nga may pito tanan ka mga kaso kun sa diin isa ang padayon nga naka-admit, tatlo ang naka-home quarantine, duha ang nakarecover na kag isa ang napatay.
Nagapangatlo ang Aklan nga may yara sang anom ka mga kaso; Iloilo City nga may yara sang lima; Capiz nga may apat ka mga kaso; Antique nga may yara sang duha kag Negros Occidental nga may isa ka kaso apang nag-ayo na sa balatian.
Pahanumdom naman ni Sta. Lucia nga indi gid dapat magpakumpyansa apisar nga isa na ka semana nga wala sang may narekord nga nagpositibo sa virus diri sa Bacolod.
