BACOLOD CITY — Nagsaka sang 84.5 porciento ang kaso sang Dengue sa ciudad sang Bacolod humalin Enero 1 tubtob Hulyo 8 sini nga 2017 kun ikumparar sa kasubong nga period sang nagligad nga tuig.
Suno kay Dr. Grace Tan, ang head sang environment and sanitation division sang City Health Office, nagalab-ot sa 535 ka mga kaso sang Dengue subong kun sa diin lima ang nagkalamatay.
Ini ang mas mataas ikumparar sa 290 ka mga kaso sang kasubong nga period sadtong 2016 kun sa diin duha ang nagkalamatay.
Ang lima nga nagkalamatay ginalakipan sang 10-anyos nga taga Purok Santo Niño, Barangay Sum-ag sadtong Enero uno; 6-anyos nga taga Purok Sigay, Brgy. Singcang sadtong Enero 6; 8-anyos nga taga-Bargy. Granada sadtong Marso 16; isa ka taga-Barangay Handumanan sadtong Abril 21 kag ang pinakaulihi amo ang duha katuig nga bata nga taga-Barangay 14 sadtong Mayo 7.
Suno kay Dr. Tan, ang Barangay Vista Alegre (62), Mansilingan (52) kag Granada (32) ang may pinakamataas nga numero sang mga natapikan sang dengue samtang ang Barangay Bata nga sadto ang may pinakamataas nga numero sang Dengue patients ang may yara na lamang sang walo ka mga kaso subong.
May kaangtanan sini, ginasiguro sang Philippine Red Cross Bacolod-Negros Occidental chapter nga may bastante nga suplay sang dugo agud may igahatag sa mga magkinahanglan sa tunga sang nagataas nga numero sang dengue cases.
Suno kay Rita Benita Mirasol, officer-in-charge (OIC) administrator sang Philippine Red Cross Bacolod-Negros Occidental chapter, nga ila ginasiguro nga indi sila mahubsan sang suplay sang tanan nga type sang platelets agud may igatan-ay bisan isa lang ka bag sa kada pasyente sang dengue.
Nahibaluan naga nagaka-expire ang platelet tagsa lima ka adlaw kag kinahanglan ang regular nga pagtipon sang suplay sini gikan sa blood donors.
Samtang, liwat nga nagapang-imbetar si Mirasol sa publiko para sa paghiwat sang Dugong Bombo sa maabot nga bulan sang Nobyembre.
Ginpabutyag sini nga sigurado madamo naman ang magakari sa venue agud magdonar sang ila hamili nga dugo kag daku ini nga bulig agud maluwas ang kabuhi sa tion sang emerhensya.
