Nagsaka sang masobra 850 porsyento ang kaso sang dengue nga narekord sa probinsya sang Negros Occidental halin sang Enero 1 tubtub subong nga Hulyo kun ipaanggid sa kaangay nga period sang tuig 2021.
Suno kay Provincial Health Officer Dr. Ernell Tumimbang, 2, 375 ka dengue cases ang narecord halin sang January 1 tubtub July 16, 2022.
Ini ang 857.66 percent higher ukon mas mataas sang 2,127 kun ipaanggid sa 248 ka mga kaso nga narekord sang January 1 tubtub July 16, 2021.
Kaina sang aga, ginsapol ni Governor Eugenio Jose Lacson kag sang provincial health officer ang tanan nga municipal kag city municipal health officers sa probinsya agud pamangkuton sang ila interventions batok sa dengue.
Ginhibalo man sang gobernador kun may available nga pondo ang mga health offices.
Suno sa mga ini, nakasugod na sila sang intervention kaangay sang pag-edukar sa mga pumuluyo sang bulan sang Enero.
Nakatukod naman sila sang triage area para sa mga pumuluyo nga nagasulod sa health center nga may yara sang fever.
Ginstress sang gobernador sa mga health officers nga iactivate ang Dengue Task Force agud nga maaddress ang current status sang dengue.
Ginhibalo man sang gobernador kun may pondo ang mga ini kag kun nakahatag ang Kapitolyo sang mga paraphernalia nga gamiton batok sa lamok.
Suno kay Tumimbang, nakapanagtag na sila sang dengue test kits kag larvicidal nga ginbakal sang provincial government sang September 2021.
