Dakop sa akto ang 34 anyos nga notorious nga kawatan matapos manulod sang balay sa Block 10, Lot 25 kag 26, DC 3, RPHS, Brgy Alijis, Bacolod City alas-6:00 kaina sang aga.
Ang kawatan ang ginkilala nga si Mark Angelo Lamis alyas Nonoy, 34 anyos, wala sang trabaho kag residente sa Block 18, Lot 24, Landville 3 Subdivision, Brgy Mansilingan, Bacolod City.
Ginapahayag nga ginhulat lamang ni Lamis nga makagwa ang tag-iya sang balay nga si John Michael Carmona, 35 anyos, single, overseas Filipino worker, kag ginsulod sini ang balay paagi sa pagtaklas sa pader.
Ginpudpod man sini ang mga buka nga botelya nga ginhamtang sa babaw sang pader agud makasulod.
Apang may-ara sang nakakita sa kawatan, kun sa diin nagpakilala ini nga siya ang caretaker sang balay.
Bangod kilala sang namangkot ang tag-iya, gilayon man sini nga ginsugiran, samtang ginpalibutan na sang mga pumuluyo ang balay agud indi makagwa ang kawatan.
Ginlock na lamang sang kawatan ang gate gikan sa sulod, agud indi makasulod ang mga pumuluyo nga may mga bitbit na nga pamakol.
Suno kay Carmona, ginapatihan nila nga ang suspect amo man ang may kahimuan sang pagpangawat sa pila ka mga balay sa lugar, kaangay sa iya kaingod nga natabanan sang masobra P100,000.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, luwas sa mga kinawatan, nakuha nila sa bag ni Lamis ang .38 caliber revolver nga may duha ka live ammunition, kutsilyo nga nagalaba sang 13 inches, may ara man ini sang madamo nga pick locks ukon pangbukas sang mga kandado, gloves kag pliers
Nakuhaan man ang suspect sang tatlo ka sachet sang suspected shabu.
Panawagan naman ni Santillan sa iban pa nga mahimo nabiktima ni Lamis nga magkoordenar agud madugangan ang ifile nga kaso.
