Nangin emosyonal ang isa ka miyembro sang Taiwanese boyband F4 nga si Ken Chu sa solo concert sini sa China.
Ini matapos nga maglapta ang isyu nga indi siya makaupod sa F4 sa ila nga masunod nga concert tour.
Nahibaluan nga si Chu, 47-anyos, Taiwanese singer-actor ang nagpatigayon sang Yangjiang leg sang iya ‘The Starting Point of the Breaking Point’ concert tour sa Guangdong province sang Nobyembre 15.
Ginperform sini ang pila ka paborito nga F4 hits kaangay sang “Meteor Rain” (2001) kag “At the First Place” (2001).
Sa isa ka video nga nag-viral sa China, samtang nagakanta si Chu nagkuha ini sang tu-alya kag gintrapuhan ang iya nga guya kag nakita man sang mga fans nga nagapalamula ang mga mata sini.
Matapos ang concert, ginpahayag ni Chu nga isa ini ka “An unforgettable night”.
Madumduman nga nangin masanyog ang Taiwanese idol drama nga “Meteor Garden,” kag si Chu ang isa sa apat ka miyembro sang F4 nga nakilala bilang si Xi Men, upod sanday Jerry Yan ukon Daoming Si, 48-anyos, Vic Chou ukon Hua Ze Lei, 44-anyos kag si Van Ness Wu ukon Mei Zuo, 47-anyos.
Suno diri, sa tunga sang preparasyon, gin-disclose ni Chu ang detalye sa comeback sang grupo apang suno diri wala pa sang final nga detalye ang grupo rason nga naapektuhan ang plano para sa ila nga concert tour.
Bangud sini, ginpili sang B’in Music nga indi na updon si Chu sa masunod nga mga plano agud masiguro ang smooth nga promotion sang comeback.
Samtang ang tatlo ka miyembro ang magapadayon sa tour sa pangalan nga “F3.”
Nahibaluan nga ang F3 concert tour magasugod sa Disyembre sa Shanghai, China.
