Opisyal na nga ginsuguran ang Fire Prevention Month sa Bacolod City subong nga adlaw, Marso 1.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, “Sa pag-iwas sa sunog, hindi ka nag-iisa” ang tema sang Fire Prevention Month subong nga 2025.
Indi kaangay sang nakaligad nga tinuig nga ang programa ang gina-umpisahan sang motorcade, subong nga tuig, ginsuguran ang programa sa pagpatigayon sang misa alas-8:00 kaina sang aga.
Alas-11:00 tubtob alas-11:59 ang nagserbe nga huddle time agud mapreparahan ang alas-12:00 sang udto nga lima ka minutos nga simultaneous blowing of horns sa Central Fire Station sa San Juan Street, Barangay 8, Bacolod City.
Alas-12:05 naman nagsugod ang ila nga motorcade kun sa diin sila ang naglibot sa nagkalainlain nga bahin sang ciudad tubtob makalab-ot sa Ayala Capitol Central.
May programa naman nga ginpatigayon alas-2:00 kaina sang udto sa nasambitan nga mall.
Paathag ni Masip nga duha ka adlaw ang kickoff activity sang Fire Prevention Month 2025 kag bwas sila ang may mga dugang pa nga programa.
Kalakip diri ang fire square road show, simulation sang CPR kag rappelling sang mga bombero kag may ara man sang poster making kag drawing competition para sa mga kabataan.
Samtang ang 3rd Mayor Albee Fire and Rescue Olympics sa Marso 22 ang magaserbe nga highlight sang aktibidad.
Indi kaangay sa una nga duha ka selebrasyon nga mga Community Fire Auxillary Groups lamang sa mga Barangay ang nagapartispar, subong nga tuig, may gindugang nga company kag school category.
