BACOLOD CITY – Patay ang kilala nga pulis nga nag-serbi bilang hepe sa nagkalain-lain nga police station sa Negros Occidental, subong man sa syudad sa Bacolod sa ginpatigayon nga buybust operation sa Dipolog City, kagabi, matapos nga nag-bato sa mga otoridad.
Sa impormasyon nga nakuha sang Bombo Radyo Bacolod, gin-padangat sa Corazon Aquino Hospital si Police Supt. Santiago Rapiz matapos ini gin-tiro sang mga katapo sang Counter Intelligence Task Force ukon CITF sang Dipolog City PNP.
Las-7:40 kagabi sang nag-patigayon sang buybust operation ang nasambit nga operatiba sa sulod sang sports center sa Andres Bonifacio College sa bahin sang Barangay Miputak, Dipolog, kun sa diin target nila si Rapiz nga naga-hampang pa sang basketball.
Pagkatapos sini sa paghampang sa basketball, natabo gilayon ang pagbaklanay sa sulod sang nasambit nga campus.
Apang sang namutikan ni Rapiz nga otoridad ang ka-transaksiyon, gilayon naman ini nga nagbato, rason nga nagbalos ang mga kapulisan nga gin-tunaan sa kamatayon sini.
Dead-On-Arrival nga gin-padangat sa nasambit nga ospital kag wala pa mahibaluan kun sa diin ang igo sini.
Si Police Supt. Santiago Rapiz, ang naka-assigned sadto sa probinsiya sang Negros Occidental, kag nag-serbi bilang hepe sang Victorias City Police Station, Escalante Municipal Police Station, kag nangin head man sang Police Community Relations sa Negros Occidental Police Provincial Office, kag sa Bacolod City Police Office ukon BCPO.
Mahibaluan nga si Rapiz ang nalakip sa 7 ka mga gin-pang relieve sa ila nga pwesto sa nasambit nga probinsiya bangud sa gina-alegar nga protektor sa illigal nga droga.
