Nagpahayag ang konsehal sa ciudad sang Bacolod,nga indi lang una nga bes nga may nasapwan nga parte sang lawas sang tawo sa ciudad
Sa interview sang Bombo Radyo Bacolod kay Councilor Al Victor Espino, chairperson sa Committee on Laws and Ordinances sa Sangguniang Panlungsod, makapila na nga matabo nga may nagakasapwan na lamang nga parte sang lawas sang tawo sa ciudad.
Madumduman nga nasapwan na lamang sa gwa sang talatapan sang National Bureau of Investigation (NBI) – Bacolod kahapon sang aga, ang sako nga naga-unod sang bag nga ginsudlan sang utod nga nawala nga kamot, nawala nga tiil kag pares sang dulunggan sang tawo.
Kaupod sini, may papel man sa sulod sang bag nga may nakasulat nga “William De Arca protector ni Hanz Lopez ang druglord”.
Ini ang daw kaangay nga nagapakita na nga halabuyan sang chop-chop nga lawas sang tawo ang Bacolod City.
Gani naga-upod ang konsehal sa pahayag ni Bacolod City Mayor Alfredo “Albee” Benitez, nga indi pag umiron ang pangalan sang Bacolod City kun luyag nga ipalab-ot nga mensahe.
Suno diri, siya mismo ang magapanindugan sa pagkondenar sa kaangay nga buluhaton bangod ini ang indi nagakadapat sa ciudad.
Paathag ni Espino nga ang Sangguniang Panlungsod ang nagasuporta sa Bacolod City Police Office, apang luyag man nila makakita sang resolusyon sa kaso.
Suno diri, ang isyu ang ila talakayon sa regular session kun sa diin siya ang magadihon sang ordinansa nga wala lang nagakondenar sa krimen, kasubong man magaduso kay BCPO Director Police Col. Noel Aliño nga madasig nga solbarun ang kaso.
Suno kay Espino, apisar nga masami ginahambal nga isolated cases ang mga insidente, luyag gihapon sang mga ini nga iutilize ang resources sang BCPO agud matuldukan na ang nasambitan nga krimen.
Panindugan sang konsehal, nga dapat gilayon nga masolbar ang kaso indi bangod sa National Bureau of Investigation (NBI) ang ginapahog, indi bangod NBI agent ang involved, kundi bangod ini ang nagahatag sang kakugmat sa mga Bacolodnon.
