Maga-abanse sa na sa finals ang Algerian boxer apisar sang ginpangatubang sini nga gender controversy matapos nga magdaog sa semifinals sa Paris Olympics kahapon, adlaw sang Miyerkules kun sa diin nasiguro na sini ang silver medal.
Ginlutos ni Imane Khelif ang 2023 world silver medalist sang Thailand nga si Janjaem Suwannapheng paagi sa unanimous points decision gani magaabanse na ini sa finals sang women’s 66kg category samtang si Lin Yu-Ting sang Taiwan, ang isa pa ka boxer nga ginakwestyon man ang eligibility, nakasiguro naman sang bronze medal sa lain nga weight.
Ang 25 anyos nga si Khelif kag Lin ang lunsay naghampang sa Tokyo Olympics, tatlo na katuig ang nakaligad apang wala sang nangin kontrobersiya sadto kag wala man sa ila ang nakakuha sang medalya.
Lunsay ang mga ini na disqualify sa nakaligad nga world championship matapos nga wala makapasar sa gender eligibility tests, apang sila ang naclear agud nga makahampang sa Paris Olympics.
Si Khelif man ang nakakuha sang pinakamadamo nga cheer sang Miyerkules sang gab-i, oras sa Pilipinas sang ini ang nagsulod sa arena sa Roland Garros, ang masami ginahiwatan sang Grand Slam tennis apang ginpatigayunan sang Olympic boxing nga ginsaksihan sang madamo nga Algerian fans samtang ginawagayway ang hayahay sang nasambit nga pungsod.
Liwat liwat naman nga mabatian sa crowd ang ” “Imane, Imane” antes kag pagkatapos sang sambuwa.
Ang Thai nga si Janjaem, nga may maathag nga height dis-advantage, ang nakakuha sang standing count sa ikatatlo nga round matapos nga mabatyagan ang bug-os nga pwersa sang superior nga Algerian.
Matapos ang sambuwa sa 15,000-seated Court Philippe-Chatrier, ang duha ang gintamyaw ang kada isa ka kag nagshake hands pa.
Samtang si Khelif naman ang nagsaot sa tunga sang ring kun sa diin nakakuha pa sang nagasigabong nga cheer gikan sa tumalan-aw.
Si Khelif kag Yang Liu ang magaatubangay para sa gold matapos nga malutos sang Chinese boxer si Chen Nien-chin sang Taiwan sa semifinals.
