BACOLOD CITY — Napatay ang 10-anyos nga bata nga lalaki nga nabungguan sang salakyan matapos ginapahayag ginbalibaran sang Doctors Hospital Incorporated sa ciudad sang Bacolod bangud wala sang inugbayad sa downpayment.
Sa ipa-Bombo Segment sang Bombo Radyo Bacolod, ginsaysay sang lola nga si Ma. Fe Sentecera sang Purok Sambag, Alijis nga nabungguan sang pribado nga awto ang iya apo nga si Asher Gamilla sa Camella Homes, Circumferential Road, Barangay Alijis sadtong Marso 1.
Napilasan ini sa ulo rason nga ila gindala sa Doctors Hospital.
Apang suno kay Sentecera, wala natandog sang mga doktor ang iya apo bisan duha na sila ka oras sa emergency room bangud wala sila sang inugbayad sa ginapangayo nga 40 mil pesos nga downpayment.
Naghingyo kuntani si Sentecera nga ipaidalom sa CT scan ang ulo sang iya apo apang wala nagpasugot ang ospital bangud kinahanglanon ang 6 mil pesos nga bayad.
Bangud sini, nagsaylo sa Corazon Locsin Montelibano Memorial Regional Hospital sanday Sentecera kun sa diin na-CT scan ang pasyente apang nagtaliwan ang bata.
Ginatinguhaan pa sang Bombo Radyo nga makuha ang sabat sang pamunuan sang ospital.
