Indi lipod sa mga pet owners ang kabudlay kun kis-a sa paghalin sa balay bangod nagasunod ang alaga.
Apang nakaagi kana bala nga naglakat ka kag wala matalupangdan nga nagasunod ang imo nga pet?
Nagdangat na sa 100 miles ang gindalagan sang van sang isa ka pamilya sa Pennsylvania nga magapadulong sa New York sang matalupangdan nga nagsakay sa atop ang ila kuring.
Suno sa pamilya Denardo, nagdangat na sa 100 miles ang ila nabyahe kag sang magdulog agud magpagasolina, didto lamang nila nadiskubrihan nga ang ila kuring nga si “Ray Ray” ang nagsakay sa atup upod sa mga bagahi.
Nakabatyag sang kakulba kag kalipay ang pamilya sang makita nga safe si Ray Ray kag nakasurvive sa atop sang van bisan pa nga nagadalagan sang 70 mph ang salakyan.
Matapos ang insidente, nagbakal sila sang mga kinahanglan ni Ray Ray sa pet store antes magpadayon sa ila weekend adventure.
Matapos sadto si Ray Ray ang nag-upod na sa ila sa paglibot gamit ang isa ka cat-carrier backpack.
