Dismayado ang secretary general sang General Alliance of Workers Association (GAWA) sa pagdismiss sang Regional Tripartite Wages and Productivity Board – Region VI sang petisyon nga ginfile sang United Labor Alliance Panay nga pasakaan sang P250 sa daily minimum wage para sa mga mamumugon sa Western Visayas.
Sa interview sang Bombo Radyo Bacolod kay Wennie Sancho, dismayado ini kun ngaa madasig ang pagdismiss sang RTWPB sa petisyon sa rason nga indi ini sufficient in form kag substance.
Suno diri, mas maayo kun tani ginpatawag anay ang alliance agud mapahibalo kun ano ang kulang sa petisyon kag ano ang dapat nga himoon.
Dugang pa sini, dapat ginhatagan anay sang malawig-lawig nga tion ang alliance para macomply ang kulang sa petisyon antes mag-issue sang dismissal.
Ginkwestyon man sini kun ngaa naghambal ang RTWPB nga indi lehitimo ang alliance nga nagfile sang petisyon bangod ang alliance ginalakipan sang mga labor ogranizations.
Iya man ginkwestyon kun ngaa nagpahayag ang RTWPB nga wala nabutang sa petisyon ang exact amount kun pila ang ginpangayo nga wage increase bangod klaro man nga nabutang nga P250 ang ginapangayo nga saka sa sweldo.
Para kay Sancho, dapat ma-eksplikar sang wage board kun ngaa madasig ang dismissal kag abiso sini sa United Labor Alliance Panay nga irevise ang petition kag liwat ini nga ifile sa wage board.
