Ginapanawagan sang Secretary General sang General Alliance of Workers Association (GAWA) nga ire-evaluate ang Rice Tarrification Law.
Nahibaluan nga pasado na sa 3rd and final reading sa Kamara ang House Bill 10381 nga may tinutuyo nga mabalik ang function sang National Food Authority (NFA) nga makabakal sang humay sa mga local farmers kag makabaligya sang bugas sa mas barato nga presyo.
Sa interview sang Bombo Radyo Bacolod kay Wennie Sancho, ginpahanumdom sini nga antes paman mapasar ang Rice Tarrification Law, madamo na sang nagapamatok diri.
Apang bangod sa pagpati sang iban nga ini ang maayo sa Rice Industry, ini ang pilit nga ginpatuman.
Karun nga nakita nga madamo sang problema, ginaduso naman nga makahimo sang amendment.
Suno kay Sancho nagagwa nga gina-eksperimentuhan lamang ang Basic Staple Food sang pungsod.
Nagalaom ini nga ang karun nga amendment ang wala sang backlash sa mga pumuluyo.
Isa sa ginapanawagan sang mga ini nga mahatagan sang nagakaigo nga subsidiya ang mga mangunguma.
Aminado ini nga sa masami, ang mga produkto sang local farmers ang ginahulat lamang sang komprador nga masami mga Chinese.
Sa masami ginabaligya naman sa barato nga balor sang mga farmers ang ila produkto bangod ini ang napangutangan na.
Pangabay ni Sancho nga lagson ang mga smuglers kag hoarders sang bugas nga nagabakal sang barato apang tuman ka mahal ang baligya sa merkado.
Suno diri, kaangay sa sugar industry, ang rice industry ang nasulod naman sang mga sindikato.
Nagalaom man ini nga ang NFA nga magaserbe regulators ang indi makaptan sang mga sindikato, partikular na nga madamo na sang mga nagtuhaw nga mga anomalya kag irigularidad sa ahensya.
