Ginalauman sang secretary general sang General Alliance of Workers Association nga mahatagan sang pagtamod ang pagpasaka sang sweldo kag ang problema sa West Philippine Sea sa State of the Nation Address ni President Ferdinand ‘Bongbong’ Marcos.
Sa interview sang Bombo Radyo Bacolod kay Wennie Sancho, sa ikatatlo nga SONA sang presidente sa Hulyo 22, ginapaabot sini nga mahatagan sang order ang pag-aprubar sang increase sa sweldo sang mga mamumugon as P100 tubtob sa P150 per day.
Suno diri, ang kamot sang mamumugon ang nagatuga sang manggad sang Pilpinas, apang ang mga mangunguma pa mismo ang ginagutom apisar nga sila ang nagatanom.
Ini tanan suno kay Sancho, ang bangod sa inflation kun diin bisan basic necessities indi na makabakal ang mga tawo.
Sa pihak nga bahin, ginlauman man sini nga mahatagan sang pagtamod ang problema sa West Philippine Sea.
Suno kay Sancho, mas maayo kun may itukod nga National Disaster and Calamity Preparedness Program para inkaso nga may matabo nga giyera dapat nga may supesyente nga supply sang pagkaon kag handa ang emergency stations.
Para kay Sancho, indi malahog-lahog ang problema sa West Philippine Sea amo nga dapat handa ang Pilpinas sa mga posible nga matabo.
